Oute 2 - Bruederschaft Bremgarte 3:7

25 März 2015

Autor: Dominik, Posted in Meisterschaft

Damet üsi Gägner dä Brecht ned verstöi, muessi ne uf Outnerdütsch schriibe. 
Am Mäntig het s Oute zwöi s letschte Saisonspöu gha. Dehei i üsere wonderschöne Sälihaue heimer Bremgarte drü empfange. Üsi Gägner hei vorgha, wie mer ider Vorrondi, zum üs izschöchtere met spezielle Maskene izmarschiere. Wöu sie aber so huere närvös gsi si heisis promt vergässe..
Bremgarte het metem Felix Houzfuess, em Züschi Züst ondem Muggi Vogelsang gspöut. Mer wie emmer metem Stefan "Betonsou" Rüegg, em Mike "Computersou" Brueder ondem Dominik "Kariessou" Zäutner. 
Am Afang esch der Stefan gäge "tschu-allez-comeon" Züschi nouzwöi hende gsi, het sech i füft Satz kämpft ond dört aber knapp verlore. Der Mike het gäge Felix nor der zwöit Satz chönne gwönne ond eisdrü verlore. E ha gäge Muggi zwar e bessere Matsch gspöut as ider Vorrondi, aber trotzdäm eisdrü verlore. Somet simer scho zemlech deftig zroggläge nach der erschte Rondi. 
Ider Rondi 2 het der Mike kei Problem gha metem Muggi ondne drüeis gschlage. Der Stefan het metem Felix sine Houzblocks, Houztopspins ond Houzschopfbäu ned vöu chönne afo ond drüeis verlore. E ha gäge Züschi i 4 kanppe Sätz gonne. Dasmou hani ne jo ned wie ider Vorrondi möse lo gönne dameter ud Düsseldorf metchonnt. Logisch. 
Im Doppu heisech bis jez beidi Teams ned us grossi Spezialeschte gautet. Der Mike ond eg hei gäge Felix ond Muggi chönne zeige wär die beschte vode schlächte si ond drünou gonne. Somet eschs nor no drüvier us üsere Secht gschtande. 
Zom Schloss het der Mike nach gonnenem Startsatz drüeis gäge Züschi verlore. Der Stefan het ou im letschte Matsch ned so zo sim Schpöu gfonde ond gäge Muggi drüeis verlore. E ha gäge Felix wie meischtens e Füfsätzer gha. Im füfte Satz hani achtdrü gfüert, de het der Felix met sinere Houzröckhand ei Ponkt nachem andere gmacht ond no gonne. Dä Souhond. Ond das obwou sini Tiimkollege för me klatscht hei. 
Ändstand 3:7 ond somet üsi ersti Saisonnederlag ider Sälihaue. 
Nachem Matsch simer natürlech no id Wartborg gange zom ufd OuteBremgarteVerbendig azstosse. Bem Eierdötschte hets e Revanche gä ond Oute het gwonne! Dasch s einzige wo zöut! Baschta! 

Zwinkernd

Vorsicht, jetzt wirds wieder ernst: 

Olten 1 spielt nächste Saison in der

neuen 1. Liga!! Durch die Niederlage

von Basel gegen Rio-Star können

Hartmut, Ronny, Toni und Marc nicht

mehr vom 4. Platz verdrängt werden.

Wer hätte das vor kurzem noch

gedacht? Herzliche Gratulation!!